Aanichatti konfirensiin qonnaan bulaa bara dheengaddaa bu’aa gaarii fideera

Godina shawaa bahaa aanaa Aqaaqiitti konfirensiin qonnaan bulaa bara dheengaddaa adeemsifame aadaa hojiifi oomisha qonnaan bulaa irratti bu’aa qabatamaa akka mul’isee ibsame.

Itti gaaftamaan waajjira gurmaa’innaa, aadaafi Ispoortii aanaa Aqaaqii Ob. Daagim Kumsaa agabaasaa gaazexaa Oromiyaatiif jidduu kana akka ibsanitti, konfirensiin qonnaan bulaa bara dheengaddaa aanichatti adeemsifame bu’aa qabatamaa argisiisuu jalqabeera.

Konfirensicharratti rakkoowwan gurmaa’innaafi aadaa hojitiin wal qabatan kan misoomaaf gufuu ta’an irratti bal’inaan mariin akka adeemsifame kan eeran itti gaafatamtichi, gama ummataatiin rakkoowwan hedduun itti amanamanii akka fudhataman eeraniiru.

Akka aanichaatti, guyyoota ayyaanaa baay’isuu, hojii ufii hojjachuu danda’an nama itti qacaranii hojjachiisuu, qusannaa dhabuufi dhugaatiin rakkoowwan ijoo konfirensicha irratti ka’an akka turan Ob. Daagim ibsaniiru.

Amma rakkoowwan turan kanniin hundaa irratti jijjiramni mul’achuu eegaleera kan jedhan Ob. Daagim, baadiyaa iddoowwan tokko tokkotti fedhii ummataatiin manniin dhugaatii akka cufamaniifi yeroo dheeras hojiirratti dabarsuun baramaa akka dhufe dubbatanii, agabaasaan kun mana dhugaatii cufamedha jedhame tokko baadiyaa bakka ganda Gogeechaa jedhamutti arguu danda’eera.

Namoonni wayta marichaa yaada guyyoota ayyaanaa baay’isuu fa’a irratti ka’e mormaa turan hedduun isaan hojiitti seenanii bu’aa gaarii argatan irraa ilaalanii hojjachuu eegalan akka jiran ibsa Ob. Daagim irraa hubanneerra.

Walumaa galatti jijjiiramni gama aadaa hojiifi haala hojiitiin dhufaa jiru kun oomishni qonnaan bulaa akka dabalu kan taasisaa jiru ta’uusaa itti gaafatamtichi nutti himaniiru. Wantoota hafan tokko tokko irratti baranas konfirensiin wal fakkaataa adeemsisuuf qophiin xumuramee hojitti seenamuusaa hubachuun danda’ameera.

Qonnaan bultoonni aanichaa haasofsiifne tokko tokkos konfirensii bar darbeerraa bu’aa gaarii akka argatan ibsaniiru.

Jiraataa aanaa Aqaaqii ganda Gogeechaa kan ta’an Ob. Gullilaati W/Goorgsi, konfirensichaan booda adeemsa duubatti hafaa ture dhiisanii ciminaan misoomatti waan bobba’aniif bu’aa gaarii argachuu isaanii nutti himaniiru.

Barumsa konfirensicha irraa argataniin qonna isaanii calla-guddiftuuwwan adda addaatti fayyadamanii waan adeemsisaa jiraniif callaansaanii akka guddate kan ibsan achuma jiraataa ganda Gogeechaa kan ta’an Ob. Wandimmuu Dagafuuti. Akka ibsa Ob. Wandimmuutti, amma isaan waan ufii hojjachuu danda’an mataadhuma isaaniitii hojjatu, irra jireessa yeroo hojii isaanii, oyiiru isaanii irratti dabarsu.

Bara dheengaddaa guutu Oromiyaatti koonfirensiin qonnaan bulaa misooma irratti xiyyeeffatu bal’inaan adeemsifamuun isaa kan yaadatamu yoo ta’u baranas konfirensiin wal fakkaataan  eegalameera.

   (Oduu- LK 302)