Barana Naannoo Oromiyaatti dargaggoota kuma 300f carraan hojii ni uumama

Naannoo Oromiyaatti bara baajata baranaatiin dargaggoota kuma dhibba sadiif carraa hojii uumuuf karoorfamee hojjetamaa akka jiru Ob. Haabtaamu Sisaay ogganaan biiroo dhimma dargaggootaafi Ispoortii ibsan.

Naannoo Oromiyaatti dargaggoota hojii dhabeeyyii ta’an addaan baasuudhaaf akkasumas, carraa hojii jiru ilaalchisee gareen biiroolee addaddaarraa baba’e kallattii addaddaatiin baatii Sadaasaa 1 hanga 25 qorannoon deemsifamuusaa Ob. Haabtaamuun eeraniiru. Itti fufuudhaanis, haala kanaan dargaggoonni hojii maleeyyii miliyoonaan lakkaawwaman naannichatti argamuusaanii beekamuusaa ibsanii, kanneen keessaa marsaa duraatti dargaggoota kuma dhibba sadiif carraa hojii uumuuf karoorri qabamee sochiin jalqabamuusaa dubbataniiru.

Dargaggoota kanneen keessaa kuma dhibba lama baadiyaa, kuma dhibbaa tokkommoo magaalaa irraa ta’uusaa oggantichi ibsanii, dargaggoota kanneeniif carraa hojii uumuuf baajanni birrii miliyoona 327 ramadamuusaa eeraniiru. Itti dabaluudhaanis, carraawwan hojii jiran haala qabatamaa aanaaleefi gandaa irratti hundaa’ee addaan ba’uusaanii eeranii, dargaggoonni kunneen hojii albuudaa, horsiisa hoolaa, re’ee, lukkuu, kanniisaa, misooma qurxummii, horii gabbisuu, misooma bosonaa, hojii qonnaa, daldalaa xixiqqaafi kanneen biroorratti akka ta’u addeessaniiru.

Galma ga’iinsa hojii kanaaf biirooleen gurmaa’ina ummataa, dhimma dargaggootaafi Ispoortii, Ijaarsa dandeettii, misooma qonnaafi baadiyaa, akkasumas biirooleen dhimmichi ilaallatu marti qindoominaan hojjechaa akka jiran Ob. Haabtaamuun eeraniiru. Itti fufuudhaanis haala qoratameen hojiin kun jalqabamuusaa ibsaniiru.

Ulaagaa dargaggoonni kunneen ittiin filataman Ob. Haabtaamuun yemmuu ibsan, “qorannoo deemsifameen naannoo Oromiyaatti dargaggoonni hojii dhabeeyyii miliyoonaan lakkaawwaman jiru. Hunduma si’a tokkoo hojii qabsiisuun waan hin danda’amneef marsaa duraatti hiyyeeyyii qotiyyoo, lafa qotan kan hin qabneefi hiyyummaa hamaa keessatti argamaniifi, fedhii hojiifi naamuusa qaban ummanni akka filatu taasisuuf ulaagaan ba’eera. Filannoo kana keessattis loogiiniifi firaan hojjechuun akka hin jiraanne ummataaf leenjiin fufiinsa qabu ni kennama” jedhaniiru.

Hojii kana milkeessuuf Muddee 28 hanga Amajjii 1 qaamolee raawwachiisaniif leenjiin leenjistootaa akka kennamu ibsa oggantichaarraa baruun danda’ameera.

(Oduu- LK 313)