Dargaggoota kuma 33 ol ta’aniif carraan hojii ni uumama jedhame

Godina Wallagga bahaatti dargaggoota kuma 33 ol ta’aniif carraa hojii uumuuf karoorri qabamee hojiin jalqabamuusaa Ob. Tafarii Xiyyaaroo waajjira Gurmaa’ina ummataa godinichaatti itti gaafatamaan damee dhimma hojjettootaafi hwaasummaa ibsaniiru.

Godinichatti dargaggoota baadiyaa keessa jiraatan 25,728, akkasumas dargaggoota magaalaa keessa jiraatan 9,000f carraa hojii uumuuf birrii miliyoona 8 ol mootummaan naannoo Oromiyaa ramaduusaa Ob. Tafariin eeraniiru. Itti dabaluudhaanis, dargaggoonni kunneen hojii qonnaa, misooma qurxummii, aannanii, daldala xixiqqaa, hojii albuudaa, misooma bosonaafi kanneen biroorratti akka bobba’an addeessaniiru.

Galma gaiinsa hojii kanaafis tibba darbe magaalaa Naqamteetti namoota dhimmisaa ilaallatuufi waajjiraalee addaddaarraa baba’an 170f leenjiin leenjistootaa kennamuusaa odeeffannoon waajjira Gurmaa’ina ummataarraa argame ni addeessa.

(Oduu- LK 317)