Dargaggoota hojiitti seensisuuf hojiin hojjetamu karooraa olitti adeemaa jira

Sochiin mootummaan biyyaleessaa naannoo Oromiyaa dargaggoota hoji dhabeeyyii baadiyaafi magaalaa naannichaatti argaman hojiitti seensisuuf taasisaa jiru hirmaannaa qaamota addaa addaatiin karoora qabamee olitti akka raawwatamaa jiru biiroon dhimma dargaggootaafi Ispoortii naannichaa ibse. Naannichi barana dargaggoonni 300,000 kan hojii hin qabne hojii mataa isaanii akka argatan taasisuuf karoorfatee akka socho’aa jiru ni beekama.

Hoogganaan biirichaa Ob. Habtaamuu Siisaay ibsa jidduu kana gaazexaa Oromiyaatiif kennaniin akka addeessanitti, barana dargaggoota baadiyaa 200,000 hojitti seensisuuf kan karoorfame yoma ta’ellee, sochii hanga gandaatti taasifameen dargaggoonni hojii hin qabne 600,000 ta’an gurmaayanii leenjii argataniiru. Isaan keessaa 398,000 kan ta’an hojitti bobbaasuuf kan itti deemamaa jiru ta’uu isaatiifi 253,000 kan ta’an ammoo ummataan calalamuu isaanii Ob. Habtaamuun addeessaniiru. Sochii kanaanis hanga ammaatti dargaggoonni 20,000 ta’an lafa mataa isaanii akka argatan taasifamuu isaas eeraniiru. Akka ibsa isaaniitii maallaqa hojii kanaaf ramadame mil.127 ta’u keessaa mil. 91 gad bu’ee godina gayeera.

Hirmaannaan qaamoleen addaa addaa sochicha cimsuuf taasisaa jiran jajjabeessaadha kan jedhan Ob. Habtaamuun, hojichi mootummaa qofaan kan galma hin geenye waan ta’eef hirmaannichi caalmaatti akka cimuufis gaafataniiru.

(Oduu- LK 320)