Godina Wallaggaa lixaatti humnoonni farreen nageenyaa yakka addaddaa jiraattota irratti raawwatan

Godina Wallagga lixaatti jiraattonni aanaalee lamaa humnoota farreen nageenyaatiin yakki ajjechaafi dirqisiisanii gudeeduu akka isaan irratti raawwatame ibsan.

Dubartoonni aanaalee Gimbiifi Laaloo Assabii keessa jiraatan tokko tokko garee gaazexessoota achitti argametti akka himanitti, gochaa shaabiyaafi ABOn qindeessaniin, akkasumas deeggartoota ABOfi dhaabbilee karaa nagaatiin qabsoofna jedhaniin dirqisiifamanii gudeedamaniiru, abbaan manaafi ijoolleen isaanii jalaa ajjeefamaniiru.

Jiraattuu ganda Leellisaa Iyyasuus kan ta’an ad. Ilfinash Tolasaa akka dubbatanitti, abbaan manaa isaanii Ob. Tazarraa Shifarraaw balbala isaanii irratti rasaasaan adda keessa rukutamanii ajjeefamaniiru. Ilmi isaanii kan waggaa 14 garaa isaa saanjaan waraanamee ajjeefameera, boorsaa nama du’ee kana keessaas birriin kuma 7 fudhatameera. Kana malees mucaan isaanii kan waggaa 8 rasaasaan adda keessa rukutamee madaa’ee Finfinnee Hoospitaala Xuqur Anbassaatti yaalamaa akka jiru ad. Ilfinash ibsanii, isaanis taanaan uleefi sadafii qawweetiin tumamanii erga kufanii booda du’aniiru jechuun dhiisanii akka deeman ibsaniiru.

Aanaa Laaloo Assaabii ganda Jaarsoo Dammataa kan jiraataniifi haadha ijoollee 6 kan ta’an tokko abbaa manaafi ijoollee isaanii fuulduratti haala suukaneessaa ta’een guddeedamuu isaanii dubbataniiru. Halkan tokko si’a tokkotti namoota jahaan waan gudeedamaniif rakkoo fayyaatiif saaxilamuu isaaniin alatti HIVf saaxilamuun danda’a yaaddoo jedhu akka qaban ibsaniiru. Ganda Innaangoo kaalii kan jiraattuufi dhihoo kana kan kaadhimamte dureen waggaa 16 dirqisiifamtee akka guddeedamte ibsiteetti.

Aanaa Laaloo Assaabii ganda Bokkuu Assaabii kan jiraatan ad. Ayyaantuu Lammii, ad. Caaltuu Jaatee, Ob. Baqqalaa Qana’aa, Ob. Tamasgeen Baqqalaafi ad. Daawituu Wadaajoo garee gaazexessootaaf akka ibsanitti, manni jireenyaa isaanii qabeenyaa guutuu waliin waan barbadaa’eef maatii isaanii waliin rakkoo hawaasummaaf saaxilamaniiru.

Manni isaanii humnota farreen nageenyaatiin waan gubateef uffanni, faayaan adda addaa, qabeenyi hundi barbadaa’ee birriin 3,500 saamamanii uleen erga tumamanii booda ijoollee isaanii baattatanii bosona bulanii lubbuun isaanii hafuu kan ibsan Ob. Baqqalaa Qana’aa namoota miidhaa isaan irraan ga’an eenyu akka ta’an maqaa dhahaaniiru.

Namoota miidhaan irra ga’e keessaa harkiifi miilli isaanii kan reebichaan cabe, addi isaanii kan buruqe akka jiran gareen gaazexessoota arguu isaa waaltaan gabaaseera.

(Oduu- LK 315)