Guddina dinagdee eegalame itti fufsiisuuf ciminaan akka hojjetu ADWUIn beeksise

Guddina dinagdee biyyi keenya galmeessifte itti fufsiisuuf ADWUIn ummata waliin dhiheenyatti mari’achaa akka hojjetu miseensi koree hojii raawwachiiftuu ADWUI beeksiisan.

Miseensa koree hojii raawwachiiftuu ADWUI kan ta’an Ob. Barakat Sim’oon laalleewwan ADWUIf ibsa kennaniin akka beeksisanitti, ADWUIn raawwii hojii irratti hir’inoota mul’atan mariin hiikuudhaan guddinni dinagdee galmaa’aa jiru osoo wal irraa hin citiin itti fufsiisuuf ni hojjeta.

ADWUIn waggaa waggaan guddina dinagdee dhibbeentaa 9-11 galmeessisaa akka jiru kan ibsan Ob. Barakat, kunis imaammataafi tarsiimoo sirrii ta’e baasuufi hojiirra oolchuun bu’aa argame akka ta’e dubbataniiru. Itti fufuudhaanis, dinagden biyya keenyaa dameelee misoomaa hundan magaalaafi baadiyaatti guddachaa akka jiru eeranii, imaammataafi tarsiimoo ba’e irratti hundaa’uun humna namaa, lafaafi bishaanitti sirriitti fayyadamuun waan eegalameef oomishtummaan dabalaa deemuu isaa ibsaniiru.

Wal amantaa ADWUIfi qonnaan bulaa jidduu jiru ilaalchisuun gaaffii dhihaateef Ob. Barakat deebii kennaniiru. Haaluma kanaan imaammataafi tarsiimoo ADWUI irraa osoo hin ta’iin, raawwachiisu irratti rakkoolee mul’ataniiru. Rakkoolee kanas qonnaan bulaan ifatti akka kaasu ADWUIn qonnaan bulaa waliin marii adeemsiseera. Komeewwan ka’anis ADWUIn hiikeera. Fuuldurattis komeewwan hafan yoo jiraatan adeemsaan hiikoo ni argatu, akka Ob. Barakat jedhanitti.

Dinagdee biyya keenya keessatti mul’achaa jiru tasgabbaa’aa qofa osoo hinta’iin si’ataa dhas kan jedhan Ob. Barakat, mootummaas ta’e ADWUIn guddina si’ataa, bal’aafi dameelee hunda irratti mul’atu kana itti fufsiisuuf ga’umsa qabu jedhaniiru. Itti dabaluudhaanis, muuxannoowwan ADWUIn, mootummaafi ummanni argatan kunneen sochiin eegalame kun hatattamaan akka itti fufu humna ta’uun akka gargaaran addeessaniiru.

Qixni gurguddoo ta’an kan ittiin hojjetamaa jiran akkuma jiranitti ta’ee fuulduraaf hirmaannaan kan taasifamu sochii misoomaa jalqabame amansiisaafi si’ataa, akkasumas bal’ina akka qabaatu gochuu akka ta’e Ob. Barakat ibsaniiru. Akkasumas ADWUIn, raawwii demokraatawaafi ummata waliin mari’achuun kan adeemsifu akka qabaatu ni hojjeta jedhaniiru.

(Oduu- LK 319)