Hojiiwwan misoomaafi bulchiinsa gaarii baatiiwwan jahaa darbee hojjetaman  bu’aa qabeessa ta’uunsaanii ibsame

Hojiiwwan misooma si’ataa fiduufi ol’aantummaa seeraa mirkaneessuuf baatiiwwan jahan darban keessatti hojjetaman bu’aa qabeessa ta’uusaanii caffeen ADWUI mirkaneesse. Yaa’ii dhaabbatummaa baatii Bitooteessa keessa deemsifamuu qaba ture baatii jahaaf akka dheeratu murteesseera.

Caffichi walga’ii idileesaa tibba darbe gaggeesseen hojiiwwan misoomaafi bulchiinsa gaarii baatiiwwan ja’a keessatti hojjetaman qorateera. Gama ijaarsa sirna demokraasiitiin dhimmoota filannoo wajjin walqabatanii ka’an karaa nagaafi seera qabeesummaan hiikuuf taasifame bu’aa qabeessa ta’uusaanii ibsee, gama biraatiinimmoo sochii farreen ummataa Heera mootummaa humnaan diiguuf taasisan, karaa ol’aantummaa seeraa eegsiisuun, haala amansiisaa ta’een fashalaa’uusaa caffichi mirkaneesseera.

Naannoo Oromiyaa iddoo tokko tokkotti Shaabiyaaniifi ABOn oggantoota qindoominaa deeggaruudhaan nageenya ummataa jeequuf sochiin gochaa turan karaa demokraasii, seera qabeessaafi haala ummata hirmaachiseen fashalaa’uusaa qorateera. Ijaarsi sirna demokraasii akka hin gufanneefi duubatti akka hin deebine hojiiwwan jalqabaman ciminaan itti fufuu akka qaban caffichi ibseera. Itti dabaluudhaanis dhaabbileen siyaasaa mana maree bakka bu’ootaa ummataa keessa seenan wajjin mariin jalqabame ciminaan akka itti fufuu ibseera.

Gama misoomaatinis guddina dingdee waggootii sadan darbaniif haala fuufiinsa qabuun galmaa’e jajjabeessaa ta’uusaa caffichi eeree, gara fuul duraafis guddina oomishaa fiduuf miseensonni ADWUI, ummanniifi ogeessonni akka tumsan waamicha dabarseera. Baatiiwwan darbanitti marii hojjettoota mootummaa, qonnaan bulaafi barsiistootaa wajjin godhamaniifi leenjiin kenname bu’aa gaarii argamsiisuusaa caffichi eereera. Marichi addaan ba’iinsii ilaalcha siyaasaa guddina biyyaarratti waliin hojjechuu akka hin dhorkine hubannoon kan itti argameefi haalli wajjin hojjechuuf dandeessisu uumamusaa mirkaneesseera.

Baatiiwwan dhufanitti dargaggoota, dubartoota gurmeessuuf misooma magaalaafi bulchiinsa gaarii mirkaneessuuf akkasumas, bulchiinsa aanaaleefi gandootaa cimsuuf hojiiwwan jalqabaman xiyyeeffanoo addaa kan barbaadu ta’uusaa miseensonni caffichaa irratti walii galaniiru. Caffichii yaa’iin dhaabbatummaa baatii Bitootessaa keessatti deemsifamuuf ture akkaataa seera ittiin bulmaataa dhaabichaatiin baatii jahaa booda akka deemsifamu murteesseera.

Misooma biyyattii si’achiisuufi bulchiinsa gaarii haala fufiinsa qabuun mirkaneessuuf deeggartoonni, miseensonniifi ummanni ciminaan akka hojjetan caffichi addeesseera.

(Oduu- LK 320)