Humnoonni dhiphootaafi oftuultootaa injifannoo argame duubatti deebisuuf socho’aa jiru jedhame

Humnoonni of tuultootaafi dhiphootaa tokkummaa uumuudhaan injifannoo ummanni argate duubatti deebisuudhaaf socho’aa jiran ummanni irratti dammaqee akka qabsaa’u, akkasumas, misooma si’achiisuufi bulchiinsa gaarii mirkaneessuuf miseensonni Dh.D.U.O adda dureen akka hojjetan ibsame.

Ob. Kumaa Dammaqsaa miseensa koree hojii raawwachiftu Dh.D.U.Ofi ministirri ministeera ittisa biyyaa akka ibsanitti, humnoonni of tuultootaafi dhiphootaa guddina siyaasaa biyyi keenya irra geesse irraa ka’uudhaan demokraasii argame gufachiisuuf tokko ta’anii socho’aa jiru. Humnoonni farreen ummataa kunneen fedhiinsaanii garaagarummaa qabaatus wayita ammaa injifannoo ummanni argate duubatti deebisuuf tokkoomanii socho’aa akka jiran Ob. Kumaan eeranii, ummannis sochii farreen ummataa kanneen fashaleessuuf qabsaa’uu qaba jedhaniiru.

Qabsoo haadhawaa taasifameen ummanni abbaa mirgaa ta’eera kan jedhan Ob. Kumaan itti dabaluudhaanis, yemmuu hundeeffama waggaa 16ffaa Dh.D.U.O kabajnu injifannoo arganne kunuunsaa, injifannoo caalaa galmeessisuuf waadaa galuudhaan ta’uu qaba jedhaniiru.

Misooma biyya keenyaa si’achiisuufi bulchiinsa gaarii mirkaneessuuf miseensonni Dh.D.U.O adda dureen hiriiru akka qaban Ob. Kumaan addeessaniiru.

(Oduu- LK 320)