Inistiityuutichi meeshaalee qonnaa haaraa qorannoon baasaa jira

Inistiituyuutii qorannoo qonnaa Oromiyaatti daareektareetiin qorannoo meeshaa qonnaa fooyya’an baasuudhaan qonnaan bulaan akka itti fayyadamu taasisaa akka jiru Ob. Umar Xaahaa bakka bu’aan daareektareetichaa ibsan.

Daareektareetiin kun dameewwan Jimmaa Harargee, Baakkoofi Asallaatti qabuun bara 1984 irraa eegalee qotaa fooyya’aa akaakuu addaaddaa 1,245, kan biyyee bulleessu 97, gaariiwwan beelladaan harkifamaniifi harkaan dhibaman 2,655, maashinii boqqoolloofi qamadii, garbuu dhahu 427, sumsuma qoraan qusatu 6,129fi kanneen biroo qoratee baasuudhaan qonnaan bulaan akka itti fayyadamu taasisuusaa Ob. Umar eeraniiru. Itti dabaluudhaanis meeshaa motoraan hojjetu sa’aatii tokko keessatti boqqoolloo kuntaala 40-50 falfaluu danda’u baaftuumosee, duugduufi cuunfituu warqee meeshaa damma calaluufi raastuu aannanii sa’aatii walakkaa keessatti aannan leetiroo 12 raasu hojjetamee qonnaan bulaaf raabsameera jedhaniiru.

Kutaan kun meeshaalee qonnaa fooyya’e qoratee baasuun ala namoota maayikroo intarpiraayiziidhaan gurmaa’aaniif teknoloojii argate dabarsee kennuudhaan bal’inaan oomishamee qonnaan bulaan akka itti fayyadamu taasisaa jiraachuu isaa Ob. Umar dubbataniiru. Itti dabaluudhaanis, ‘BBM’ kuma 50 gaaguura ammayya, 22,769, triidilpaampii kuma 12 hojjechuusaanii eeraniiru.

Daareektariin kun giddu gala qorannoo Asallaa, Baakoo, Harargeefi Jimmaatti qorannoo 64 deemsisaa akka jiruufi kanneen keessaa 8 qorannaansaanii kan xumurame yemmuu ta’u, 26 qoratamaa kan jiran Haaraanimmoo 30 ta’uusaanii ibsa bakka bu’aa kanarraa hubachuun danda’ameera.

(Oduu- LK 313)