Konfiransiin barsistootaa imaammata mootummaan baaseeratti xiyyeeffatu ni deemsifama

 * Gochi farra ummataa hirmaannaa ummataan fashalaa’uunsaa ibsame

Naannoo Oromiyaatti konfiransiin barsistootaa imaammataafi tarsiimoo mootummaan baaserratti xiyyeeffatu ni deemsifama. Humnoonni farra nageenyaa manneen barnootaa tokko tokko keessatti adeemsa baruufi barsisuu guufachisuuf yaalan gochiisaanii hirmaannaa ummataan fashalaa’uunsaa ibsame.

Ob. Muktaar Kadiir itti aanaa prezidaantii mootummaa Biyyaaleessaa Naannoo Oromiyaafi ogganaan biiroo Ijaarsa Dandeettii akka ibsanitti, kaayoon konfiransii kanaa walumaa galatti barsistoonni imaammataafi tarsiimoo mootummaan baaserratti hubannoo cimaa qabatanii bu’aa caalmaa qabuuf akka hojjetan taasisa. Akkasumas, rakkoolee adeemsa baruufi barsiisu keessatti uumaman irratti bal’inaanaan mari’achuudhaan hojii egereef akka qophaa’an kan taasisu ta’uusaa Ob. Muktaar addeessaniiru.

Konfiransii kanarratti barsisoonni kuma 45 kan hirmaatan ta’uusaa Ob. Muktaar eeranii, sadarkaa sadarkaan konfiransichi haala fufiinsa qabuun ni deemsifama, barsisoonnis bal’inaan ni hirmaatu jedhaniiru.

Humnoonni farra nageenyaa godina Wallaggaafi Shawaa dhihaa maanneen barnootaa tokko tokko keessatti adeemsa baruufi barsisuu gufachiisuuf yaaliin godhan hirmaannaa ummataatiin fashalaa’uusaa Ob. Muktaar dubbataniiru. Itti fufuudhaanis, humnoonni akka qindoominaa filannoo darbeen kasaaraniifi harcaatonni ABO jeequmsa magaalaa Finfinneetti ka’e gara naannoo Oromiyaatti babal’isuuf yaaliin godhan hirmaannaa ummataafi humna nageenyaan yemmuu jalaa fashalaa’u, manneen barnootaarratti xiyyeeffachuudhaan daa’imman homaa hin beekne dawoo godhatanii fedhiisaanii guuttachuuf yaalii addaddaa godhaniiru. Meeshaa seeraan ala hidhachuudhaan manneen barumsaa keessatti jequmsa kaasuuf yaalii godhan hirmaannaa ummataatiin fashalaa’eera” jedhaniiru.

Wayita ammaa adeemsi baruufi barsisuu haala tasgabaa’een itti fufuusaa kan eeran Ob. Muktaar sochiin farra ummata kun fedhiifi faayidaa ummata Oromoo kan guufachisu waan ta’eef ummanni namoota deemsa baruufi barsiisuu gufachiisuuf yaalan seeratti dhiyeesseera jedhaniiru.

Konfiransiin barsistootaa kun Amajjii irraa eegala akka deemsifamu sagantaa ba’e irraa hubachuun danda’ameera.

(Oduu- LK 316)