Mootummaan hojiiwwan jireenya ummataa jijjiiran ciminaan ni hojjeta

Mootummaan naannoo Oromiyaa tarkaanfilee fayyadamtummaa ummataa mirkaneessan bal’inaan fudhachuu jalqabuu isaa pirezidaantiin mootummaa naannoo Oromiyaa Abbaa Duulaa Gammadaa ibsan.

Pre. Abbaan Duulaa Gammadaa gidduu kana ibsa gaazexessootaaf kennaniin akka dubbatanitti, karoora waggaa shaniirratti xiyyeeffachuun bara kana kara misooma baadiyaa, barnootaa, fayyaa, bulchiinsa gaariifi nageenyaatiin karoora ba’e hojii irra oolchuuf sochiin cimaan jalqabamuu isaa dubbataniiru.

Tarsiimoofi imaammata mootummaa baase kana ummatichi itti fayyadamaa akka ta’uuf hojii irra oolmaasaatiif naannoo kaasee hanga godinaattii caaseffamani bulchiinsaa akka haaraatti hunda’ee kaabinoonniifi bulchiinsonni hojii jalqabuu isaanii ibsaniiru.

Kaabinoonniifi bulchiinsonni muudaman kunneen namoota imaammataafi tarsiimoo mootummaa hojii irra oolchuuf dandeettiifi muuxannoo qaban ta’uu isaanii Abbaan Duullaa hubachiisaniiru.

Akka ibsa Abbaa Duulaatti, keessumattuu karoora misooma baadiyaa ba’e ciminaan hojii irraa oolchuudhaaf, oomisha qonnaan bulaa dabaluufi akka fayyadaman gochuutu nurraa eegama jedhaniiru.

Akkasumas qonnaan bulaaf yeroodhaan callaa guddiftuu dhiyeessuu haala gabaa bal’aa argachuu itti danda’u mijeessuun hojii ciminaan itti adeemamu akka ta’e dubbataniiru.

Qonnaan bulaan oomisha oomisheef gabaa gaarii akka argatuufi galiin isaa akka guddatu gochuudhaaf naannoo magaalaa Finfinneetti giddu galeessa gabaa shan ijaaruudhaaf karoorfamee itti adeemamaa akka jiru Abbaan Duulaa itti dabalanii ibsaniiru.

Karoorri qonnaafi misooma baadiyaa kun naannoo keenya keessatti murteessaadha kan jedhan Abbaan Duulaa, ummanni keenya baadiyaa keessa jiraatuu karoora kana galmaan ga’uuf (hojii irra) oolchuuf tokkummaan ka’uu qaba jedhaniiru. Akka ibsa Abbaa Duulaatti, mirga Oromoon Finfinnee irraa qabu ilaalchisee yeroo amma hojiin hojjetamaa akka jiru hubachuun nidanda’ama.

Magaalaa guddittii Oromiyaa Finfinnee irratti yeroo ammaa kana giddugaleessaa addaafi seenaa ummata Oromoo calaqqisiisu ijaaruuf naannoo Mashaalokaatti yeroo dhihootti dhagaan bu’uuraa akka kaa’amu dubbataniiru.

Kana malees kutaa magaaloota Finfinnee kudhan (10) keessattis damee giddu galeessa addaafi seenaa ummata Oromoo calaqqisiisu ijaaruuf dabalataan iddoon gaafatamaa jira jedhaniiru.

Hojii kana jalqabsiisuuf bulchiinsa magaalaa Finfinnee wajjin koreen tokko dhaabate sochii irra akka jiru Abbaan Duulaa itti dabaluudhaan ibsaniiru.

Akkasumas ummanni Oromoo bakka itti ijoolleesaa  afaan isaatiin barsiifachuu danda’u mana barnootaa tokkollee waan hin qabneef rakkachaa ture jira.

Kana hiikuudhaaf mana barumsaa ijaaruudhaaf kutaa magaalaa Finfinnee kurnanuu keessatti lafti mana barumsaa itti ijaaramu qoratamaa akka jiru itti dabaluun ibsaniiru.

Karaa biraatiin ammoo hojjettoota biiroolee Oromiyaa keessa jiran abbaa mana jireenyaa gochuudhaaf mootummaan Oromiyaa bulchiinsa Finfinnee wajjiin tokko ta’uudhaan lafti manni jireenyaa irratti ijaaramu bal’inaan qoratamaa akka jiru dubbataniiru.

Magaalaa Finfinnee keessatti rakkoo gar-gar faca’iinsa  waajjiraalee Oromiyaa jiran hiikuudhaaf bulchiinsa magaalaa Finfinnee wajjin ta’uudhaan koreen teknikaa tokko dhaabbatee iddoo ijaarsi itti geggeeffamu qorachaa akka jiru pirezidaantichi dubbataniiru. Hojjettoonni mootummaa kanaan dura Adaamaa deemanii turan yeroo ammaa gara Fifinneetti deebi’uu jalqabuu isaanii dubbataniiru.

Karaa birootiin nafxanyoonni pireesii dhuunfaatiin naannoo keenya keessatti akka nageenyi hin jirre godhanii bareessuun alatti seenaafi aadaa ummatichaa xureessuudhaan kitaaba irratti baasaa akka jiran eeranii, warra aadaafi seenaa ummata Oromoo balleessuuf hinciifne kana seeratti dhiyeessuudhaaf qophiin barbaachisu xumuramaa jira jedhaniiru.

   (Oduu- LK 302)