Namoonni kuma 35 ol ta’an waldaalee albuudaatiin gurmaa’anii hojjechaa akka jiran Ob. Alamaayyoo Guddaayyaa itti gaafatamaan ejansii misooma qabeenya albuudaa Oromiyaa ibsan.

Miseensonni waldaalee kanneen oomisha cirrachaa sookoofi kanneen biroorratti kan bobba’an yemmuu ta’u, galii gaarii argachaa akka jiran Ob. Alamaayyoo eeraniiru. Itti fufuudhaanis, godina Shawaa bahaatti waldaaleen 19 oomisha cirrachaarratti kan bobba’an yemmuu ta’an waldaaleen kunneen gurgurtaa cirraachaarraa birrii miliyoona sagal argachuusaaniifi birrii miliyoona afur baankii kaawwachuusaanii eeraniiru.

Naannoo Oromiyaatti abbootiin qabeenyaa 190 kaappitaala birrii miliyoona 685 ol qaban hojii albuudaarratti bobba’uusaanii Ob. Alamaayyoon eeranii, hanga ammaattis kiraa lafaafi gibira addaddaarraa birriin miliyoona 188 ol argamuusaa ibsaniiru.

Kanaan dura namoonni hedduu hojii albuuda ilaalchisee hojii seeraan alaarratti bobba’uusaanii itti gaafatamichi eeraniiru. Itti dabaluudhaanis, hojii seeraan ala kana to’achuuf mootummaa fedaraalaa wajjin qindominaan hojjetamaa akka jiruufi feericha hojiirra olchuuf qophiin xumuramuusaa addeessaniiru.

(Oduu- LK 310)