Waldichi birrii miliyoona dhibba lamaafi kudha afurii ol liqeessuuf karoorfate

Waldaan Aksiyoona liqiifi qusannoo Oromiyaa barana birrii miliyoona 214 ol liqeessuuf karoorfatee hanga ammaatti birrii miliyoona 43 ol liqeessuusaa Ob. Gammachuu Dubbisoo hojii gaggeessan waldichaa ibsan.

Waldichi karoora baranaatiin namoota 168,393f birrii miliyoona 214.23 liqeessuuf karoorfatee hojii jalqabuusaa Ob. Gammachuun eeraniiru. Itti dabaluudhaanis karoora qabame keessaa baatii ja’a keessatti namoota 61,797f birrii miliyoona 43 ol liqeessuusaa dubbatanii hojiin kunis raawwii hojii baatii ja’aa kan bar-dheengaddaa wajiin wal biratti qabamee yemmuu madaalamu dhibbeentaa 50 caalmaa akka qabu eeraniiru.

Namoota tajaajila liqii barana akka argatan karoorfame 168,393 keessaa namoonni 158,393 baadiyaa keessatti kan argaman ta’uusaafi maammiltoota kanneeniif barana birrii miliyoona 174.23 liqeessuuf karoorfamee hojjetamaa akka jiru Ob. Gammachuun eeraniiru. Itti fufuudhaanis, magaalaa keessatti dargaggoota waldaalee intarpiraayiziitiin gurmaa’an kuma 10f birrii miliyoona 40 liqeessuuf karoorri qabamee hojii keessatti seenamuusaa eeranii, baatii ja’an darbanittis birrii miliyoona 5 ol dargaggoota kanneeniif liqiin kennamuusaa addeessaniiru.

Waldichi karoora baranaatiin birrii miliyoona 36.7 qusannaarraa argachuuf karoorfatee sochii jalqabuusaa hojii gaggeessaan kun eeranii, baatii ja’a keessattis birriin miliyoona 12 ol walitti qabamuusaa dubbataniiru. Kunis hojii bar-dheengaddaa wajjin wal biratti qabamee yemmuu madaalamu dhibbeentaa 40 caalmaa akka qabu dubbataniiru.

Waldaan Aksiyoona liqiifi qusannoo Oromiyaa aanaalee Oromiyaa keessatti wirtuulee 91 kan qabu yemmuu ta’u, maammiltoota kuma 143 ol qaba. Lakkoofsa kana guddisuufis xiyyeeffannoo ol’aanaa kennee hojjechaa akka jiru ibsa Ob. Gammachuurraa hubachuun dana’ameera.

Gama biraatiinis waldaan Aksiyoona liqiifi qusannoo Oromiyaa magaalaa Finfinnee keessatti baasii birrii miliyoona 20n waajjira muummee ijaarsisuuf, bulchiinsa yeroo magaalaa Finfinneerraa lafa heektaara 1,500 fudhachuusaa, akkasumas, ijaarsi waajjirichaa waggaa lama keessatti ni xumurama jedhamee akka eegamu odeeffannoon waldicharraa argame ni addeessa.

(Oduu- LK 318)