Naannoo Oromiyaatti bara kana biqiltoota gosa adda addaa miiliyoona dhibba toorba dhaabuuf karoorfamuusaa itti gaafatamaan damee bulchiinsa lafa baadyaa Oromiyaa beeksisan.

Waajjira qonnaafi misooma baadyaa Oromiyaatti itti gaafatamaa damee bulchiinsa lafa baadyaa fi qabeenya uumamaa kan ta’an Ob. Dirribuu Jamaal gaazeexaa Oromiyaa waliin gaaffiifi deebii taasisaniin akka beeksisanitti, biqiltuuwwan adda addaa baatii Waxabajjii dhaabaman kana qopheessuuf sochiin eegalameera.

Qixni biqiltuu dhaauuf wayta ammaa itti adeemamaa jiru dur kan baramerraa adda kan jedhan itti gaafatamaan kun, adeemsa amma jiruun biqiltuu magariisa waan ta’eef qofa dhaabuu osoo hin ta’iin, namaafi looniif faaydaa nyaataaf kan oolan, akkasumas galii adda addaa bifa argamsiisaniin qophaa’anii kan dhaabaman ta’uu addeessaniiru.

Kana malees biqiltuuwwan dhaabaman lafaaf akka xaa’ootti kan gargaaran, akkasumas kuduraafi mudraa addaaddaa akka of keessaa qaban Ob. Dirribuun ibsanii, bara kana dhaabuuf kan karoorfaman keessaa nyaata looniif kan oolu %20 akka ta’e eeraniiru.

Biqiltuuwwan barana dhaabuuf karoorfaman mil. 700 keessaa kudraafi mudraan gosa adda addaa mil. 45.5 ta’uu kan dubbatan itti gaafatamaan kun, isaanis Maangoo, Abukaadoo, Zaytuunii, Paappaayaa, Poomii akka ta’an beeksisaniiru.

Waggoota sadan darbanii kaasee biqiltuuwwan gosa adda addaa dhaabuuf hojiin hojjetamaa ture guddachaa dhufuusaa Ob. Dirribuun eeranii, bar-dheengaddaa biqiltuuwwan adda addaa mil. 585 dhaabamuu isaanii dubbataniiru.