Farreen nageenyaa to’annaa jala oolanii dhimmisaanii qulqulla’aa jira jedhame

Godinaalee Wallaggaa dhihaafi Shawaa dhihaa, aanaalee tokko tokko keessatti humnoonni farra ummataa gocha suukkaneessaa ummatarratti raawwatan to’annaa jala oolanii dhimmi isaanii qulqulla’aa akka jiru komishiniin poolisii Oromiyaa ibse.

Komaandar Dammalaash G/Mikaa’eel itti aanaa komishinara komishinii Poolisii Oromiyaa akka ibsanitti, godina Wallagga dhihaa aanaalee Gimbii, Laaloo Assaabii, Mandii, Qilxuu Kaarraafi Najjoo iddoo tokko tokko keessatti farra ummataafi harcaatoonni ABO ummatarratti yakka ajjeechaa, saamichaa, dirqisiisanii gudeeduuf kanneen biroo raawwataniiru.

Farreen ummataa jeequmsa kaasan kanaan namoonni nagaa afur du’aniiru. Miseensonni poolisii 25 midhaan qaamaa salphaafi cimaa ta’e irra ga’uusaa kan ibsan komaandar Dammalaash, itti fufuudhaanis, dubartoonni haala suukanneessaa ta’een gudeedamuusaanii akkasumas, manneen jireenyaa dhuunfaafi waajjiraaleen gandaa barbadaa’uusaanii, konkolaataan mootummaa 8 kan dhuunfaa 6 caccabuusaanii dubbataniiru.

Shakkamtoonni gocha kana raawwatan 440 to’annaa jala oolanii dhimmisaanii qulqullaa’aa akka jiru komaandar Dammalaash ibsaniiru. Itti fufuudhaanis haala wal fakkaataa ta’een godina Wallagga bahaa, aanaa Guduuruu keessatti gocha farra ummataa kunneen raawwataniin poolisiin tokko ajjeefamuusaafi sadiimmoo madaa’usaanii eeraniiru.

Godina Shawaa dhihaa aanaalee Amboo, Xuqur Inciinnifi Caliyaatti farra ummataa nageenya ummataa jeeqan shakkamtoonni 129 to’annaa jala oolanii dhimmisaanii qulqulla’aa akka jiru komaandar Dammalaash addeessaniiru. Itti dabaluudhaanis humnoota yakka kana raawwatan to’annaa jala oolchuuf hirmaannaan ummataa bal’aa akka ture addeessaniiru.

Jeequmsa farra ummataa kunneen kaasaniin walumaa galatti namoonni nagaa afur poolisiin 2 du’usaanii, dubartoonni haala suukaneessaa ta’en gudeedamusaanii, akkasumas manneen 24 barbada’uusaani ibsa komaandar Dammalaash irraa baruun danda’ameera.

(Oduu- LK 316)