Barana gandoota qonnaan bulaa naannoo Oromiyaa hundatti hojiin misooma sululaa kunuunsa qabeenya uumamaafi wabii nyaataa mirkaneessuuf gargaaru akka adeemsifamu waajjirri qonnaafi misooma baadyaa Oromiyaa ibse.

Waajjira kanatti itti gaafatamaa qajeelcha eegumsa biyyoofi bishaanii Ob. Tasfaayee Baqqalaa tibbana akka nuuf ibsanitti, bara 1996 hirmaannaa dhaabbilee mit-mootummaa, projektootaa addaddaafi bajata mootummaan ramadeen daagaan km. Kuma 30 hojjetameera. Kana malees, adeemsa kana duraa irraa muuxannoo argameen, akkasumas hanqinoota uumaman sirreessuudhaan hojii hojjetameen bar-dheengaddaa daagaan km. 90,576 hojjetamuu isaa Ob. Tasfaayeen eeraniiru.

Hojii misooma sululaa bara kana hojjetamu galmaan ga’uuf ogeessota aanaalee hanqina wabii nyaataa qaban irraa kan baba’an dhibba lamaaf leenjiin kennamuu isaa Ob. Tasfaayeen dubbataniiru.

Misoomni sululaa hojjetamu kun bu’a qabeessa akka ta’u kaabinoota aanaa, ummataaf akkasumas qaamolee dhimmi isaa ilaallatuuf leenjiin hubannoo cimsu fufiinsaan akka kennamu itti gaafatamtichi eeraniiru. Itti fufuunis, hojii misooma sululaa kana waajjiroota barnoota, fayyaa, qonnaa waliin qindoominaan hojjechuuf haalli mijaa’uu isaa ibsaniiru.

Naannoo Oromiyaa irraa waggaa waggaan biyyoon tooniin miiliyoona 448.8 ta’u akka dhiqamu tilmaamni jiraachuu isaa ibsa Ob. Tasfaayee irraa hubachuun danda’ameera.