Koreen hojii raawwachiiftuu ADWUI tibbana walga’ii idilee deemsiseen raawwannaa hojii baatii sadii darbe qorachuusaafi hojiiwwan gara fuul-duraatti xiyyeeffannoo argachuu qabanirratti mari’achuudhaan murtee dabarsuudhaan akka xumurame oduu himaan dhaabbichaa ibsan.

Gocha nageenya boreessuu oggantoonni qindoominaafi farreen ummataa taasisan fashaleessuuf hojiiwwan baatiiwwan darban keessa hojjetaman sirrii ta’uusaanii koreen hojii raawwachiftu qorateera. Baatiiwwan darbanitti iddoo maratti nageenya mirkaneessuuf hojiiwwan hojjetaman milkaa’uusaanii eeruudhaan, kana bu’ura godhachuudhaan nageenya mirkaneessuuf hojiin qindoomina qabu hojjetamu akka qabu murteesseera.

Nageenya mirkaneessuu cinatti misoomni utuu hingufatin akka itti fufuu gochuuf hojiiwwan hojjetamaniifi bu’aawwan argaman kan nama jajjabeessan ta’uusaanii akkasumas, gama oomisha qonnaatiin barana oomisha gaarii argachuuf haalli mijaa’an jiraachuusaa mirkaneesseera. Kanarraa ka’uudhaan gama misooma qonnaatiin bona kanaafi ganna dhufuutti sochii misoomaa ciminaan akka adeemsifamuufi keessaayyuu, oomishtummaa dabaluudhaaf xiyyeeffannoon ol’aanaan kennamuu akka qabu murtaa’eera. Gama biraatiinis rakkoolee hojii dhabummaafi mana jireenyaa hiikuuf paakeejii misoomaa qindaa’ee deemsisuuf qorannaan jalqabame hatattamaan xumuramee hojiinsaa akka jalqabamu koree hojii raawwachiftuu murteesseera.

Rakkoolee bulchiinsa gaarii gama bulchiinsa aanaalee, gandaa, akkasumas bulchiinsa hojjettoota mootummaa, sirna haqa fooyyessuuf qorannoon jalqabame atattamaan xumuramee hojiin akka jalqabamu koreen hoji raawwachiftuu murteesseera. Ummattoonni biyya keenyaa hojiiwwan nageenya, bulchiinsa gaariifi misoomaarratti kallattiidhaan akka hirmaatan taasisuuf hojiiwwan hojjetamaniifi bu’aawwan argaman ciminaan akka itti fufan taasisuun murteessaa ta’uusaa, haala kanaanis ummataa wajjin mari’achuudhaan rakkoolee biyya keenyaa fufiinsaan hiikuudhaaf, hojii siyaasaa hojjechuuf hojiin jalqabame ciminaan itti fufu akka qabu murtaa’eera.

Koreen hojii raawwachiftuu hir’inoota kanaan dura uumaman sirreessuudhaan hojii dhaabaafi siyaasaa ADWUI haala ciminaan raawwachisuuf kallattiiwwan ka’amaniif hojiilee jalqabaman qorachuudhaan qixa kaa’uusaarrayyuu, bajataafi karoora hojii siyaasaafi dhaabbaa ADWUI raggaasseera. Bu’ura seeratti bulmaataatiinis yaa’iin dhaabbatummaa ADWUI akka waamamu kan murtaa’ee yemmuu ta’u, koree qopheessituu yaa’iis hundeesseera.

(Oduu- LK 313)