Magaalaa Jimmaatti birr. mil. dhibba lamaa oliin hojiiwwan investimentii hojjetaman

Waggoota lamaan darban keessa magaalaa Jimmaatti hojiiwwan investimentii adda addaa birrii mil. 200 oliin hojjetamuu isaanii bulchiinsi magaalaatti beeksise.

Bulchiinsa magaalaa Jimmaatti itti gaafatamaan waajjira sab-qunnamtii Ob. Salamoon Qannoo gaazeexaa Oromiyaatiif akka ibsanitti, magaalaattiin erga riifoormii jala galtee waggoota lamaa asitti hojiiwwan investimentii barnoota, hoteela, daldalaafi kanneen biroo irratti hojjetamaniiru.

Hojiiwwan investimentii birrii mil. 200 ol ta’u kana keessatti hojiiwwan jireenya ummata magaalaa fooyyessuu danda’an raawwatamuu isaanii Ob. Salamoon eeranii, kunis hojii dhabdummaa hir’isuu keessatti shoora olaanaa akka taphate dubbataniiru. Itti fufuudhaan Ob. Salamoon akka jedhanitti, waggoota lamaan kana keessatti jiddu galeessi gabaa ammayyaa tokko, daandiin keesa-keessaa km. 10, bo’oon lolaa km. 2 ol, akkasumas gama barnootaatiin hojiiwwan adda addaa hojjetamaniiru.

Magaalaan Jimmaa ummata kuma 150 qabaachuu ishee kan nuuf ibsan itti gaafatamaan kun, akkuma baay’ina ummataa hedduu qabdu rakkoolee adda addaa hedduu akka qabdus ibsaniiru. Kanneen keessaas hojii dhabummaan, rakkoon qulqullina magaalaafi kanneen biroos akka jiran mirkaneessaniiru. Itti fuufuudhaanis, hojii dhabdummaa magaalaattii keessatti mul’atu furuuf kanneen barnoota xumuranii hojii irratti hin bobbaane gurmeessuudhaan akka hojii irratti bobba’an taasifamaa jira jedhaniiru.

Haaluma kanaan waggoota lamaan darban keessatti namoota 1,600 waldaalee 183n gurmeessuudhaan kanneen keessaa waldaalee 159 miseensa nama 1,430 kan qaban hojii keessa akka galan taasifamuusaa Ob. Salamoon dubbataniiru. Karaa wal fakkaatuun bara kanas dargaggoota 5,000 hojii qonnaa magaalaa, industirii, daldalaa keessa galchuuf karoorfamee sochiin eegalamuu isaas dabalanii ibsaniiru.

Magaalaattii keessatti ilaalchi hojiif kennamaa ture jijjiiramuu isaatiin hubannoon gaariin uumamuu isaa Ob. Salamoon dubbatanii, dargaggoonni gurmaa’anii hojii liistiroo irraa kaasanii hamma konistiraakshiniitti hojjechaa akka jiran ibsaniiru. Kana malees barattoonni barnoota isaanii xumuran hojii xurii magaalaattii kaasuu irratti kan bobba’an illee akka jiran itti gaafatamaan kun ibsaniiru.

Guddina magaalaa mirkaneessuuf investimentiin babal’achuun murteessaa akka ta’e Ob. Salamoon ibsanii, carraa investimentii magaalaan Jimmaa qabdu kan agarsiisu baazaariin guyyaa 10f adeemsifamee ture tokko gidduu kana xumuramuu isaa dubbataniiru.

(Oduu- LK 315)