Qabeenya lageen, haroowwaniifi cufa bishaanii adda addaatiin kan badhaate Oromiyaan kanneeniin kan wal qabate qabeenya qurxummiis hedduu qabdi. Haata’u malee sababoota adda addaa irraa kan ka’e qabeenyi qurxummii kun faaydaa kennuu qabu hin kennine.

Bishaan adda addaa Oromiyaan qabdu keessaa waggaatti qurxummii toonii 17,800 oomishuun yoo danda’ame illee, hamma ammaatti waggaatti kan oomishame inni guddaan toonii 4,675 akka hin caalle ragaalee ni mul’isu. Kun dhibbeentaa 30 kan hin caalle yemmuu ta’u, dhibbeentaan 70 faaydaaf hin oolle jechuudha.

Qabeenyi kun sababoota adda addaatiif faaydaa irra ooluu akka qabu beekuun barbaachisaa ta’a. Kanneen keessaa inni guddaan wabii nyaataa mirkaneessuu waliin kan wal qabatudha. Wabii nyaataa mirkaneessuu yemmuu jedhamu lafa qotanii oomisha midhaanii argachuu qofaan kan galma ga’u miti. Qabeenya adda addaa qabnu hunda yoo misoomsine wabiin nyaataa mirkaneessuu ni dandeenya. Kanneen keessaa egaa qabeenyi qurxummii tokko ta’uu ni danda’a jechuudha.

Kun osoo kanaan jiruu garuu qabeenyi kun akka barbaacisuun faaydaa barbaachisuuf hin oolle. Sababnisaa maalinni laata? Ragaan waajjira qonnaafi misooma baadyaa Oromiyaa irraa arganne akka mul’isutti sababoonni ka’uu danda’an hedduudha. Kanneen keessaa isaan gurguddoon seerri itti fayyadama qabeenya qurxummii ba’ee hojiirra ooluu dhabuu, oguma kanaan humni nama leenji’ee muraasa ta’uu isaa, ragaan gama kanaan walitti qabamee qindaa’e xiqqaachuu, tajaajilli ekisteenshinii qabeenya qurxummii baay’ee xiqqaachuu kan jedhan keessatti argamu. Walumaa gala misooma qurxummiif kan gargaaran hojiiwwan adda addaa akka hin mijoofne hubachuun nidanda’ama.

Haalli qurxummiin itti misoomu mijaa’uu dhabuun isaa kan ittiin mirkanaa’u inni guddaan tokko akka Oromiyaatti seerri itti fayyadama qabeenya qurxummii ba’uu dhabuu isaati. Naannoleen biroo seera kana baasanii hojiirra erga oolchanii bubbulaniiru. Naannoon keenya garuu hamma ammaatti seera kana hin baafne. Rakkoo kanaaf qixni kan kaa’ame bara 1995 yeroo jalqabaaf sadarkaa federaalaatti ministeera qonnaafi misooma baadiyaatiin labsiin ba’ee ture. Labsiin kun naannolee hundaaf kan ergame yoo ta’u, naannoleen haala naannoo isaanii irratti hundaa’uun akka itti fayyadaman qajeelfama waliin ergamee ture. Kun egaa qixni tokko taa’uu isaa yoo agarsiise iyyuu, akka naannootti Oromiyaan seera baafachuu dhabuun ammoo rakkoo tokko akka ta’e hubatama.

Gama biraatiin ammoo qabeenya qurxummii qabnu itti fayyadamuu dhabuun waan tokko ta’ee, qabeenya kana badiirraa oolchuunis yeroo itti barbaachisu irra akka jirrus beekuun barbaachisaadha. Iddoowwan bishaan jiranitti qonni babal’achuun, bosonni ciramuun, walumaa gala hojii qonnaa naannawa bishaan qurxummii qabuutti adeemsisuun bishaan sun biyyoon akka guutu taasisa. Kana malees dhangala’aan warshaa naannawa sanatti argamu keessaa ba’u qabeenya kana baay’ee miidha. Kanaaf kunis xiyyeeffannoo argachuu kan qabudha.

Misooma qabeenya qurxummii keessatti waajjira qonnaafi misooma baadyaa qofatu himaachuu qaba yaanni jedhu yoo jiraate dogoggora ta’uun isaa hubatamuu qaba. Sababnisaas, biiroon qabeenya bishaanii, eegumsi naannoo qaamni seeraa, biiroon daldala, industiriifi tuuriizimii fayyadamtoonni kana keessatti ga’ee guddaa qabu.

Walumaa gala qabeenyi kun xiyyeeffannoo dhabee turu illee, yeroo ammaa itti yaadamaa akka jiru ragaan waajjira qonnaafi misooma baadyaa Oromiyaa irraa arganne ni mul’isa. Kanaaf qabeenya kana misoomsinee itti haa fayyadamnu.